Rovviltjakt i Skjåk Almenning

Skjåk Almenning strekkjer seg frå innmarksnære skogområde til høgfjell på over 2100 moh. Det er lisensjakt på jerv og kvotejakt på gaupe som er mest aktuelt for jakt på store rovdyr i Skjåk, men vi har også hatt nokre få tilfelle med streifdyr av ulv og bjørn år om anna. Elles er det sjølvsagt gode moglegheiter for å drive med jakt på raudrev og fangst etter mår, samt andre smårovviltartar i Skjåk.

I Skjåk Almenning blir det frå og med 2023 slik at ein må søkje og få godkjenning frå oss om å få lov til å plassere ut åte, åtebu eller bås før jakt/fangst tek til. Det er utarbeidd eigen retningsline for dette.

I 2021 vedtok kommunestyret i Skjåk å løyve midlar til prosjektet «Meir effektiv lisensfelling på jerv». Nettopp dette aktualiserer at Skjåk Almenning som grunneigar no legg nokre føringar for jakt og fangst på rovvilt. Målet med denne retningslina er å koordinere rovviltjakt i almenninga slik at den blir så effektiv som mogleg.

Du finn også mange nyttige lenker i dokumentet, retningslina kan du laste ned her.

 

Skotpremieordning

Skjåk Almenning har skotpremie på ein del predatorar som tiltak for å gjere levekåra betre for anna småvilt. For å få registrert/godkjent skotpremie må viltet visast fram for Skjåk Almenning og viltet må naturlegvis vere felt innanfor Skjåk kommune. Hugs å løys rovviltkort i Skjåk Almenning før jakt. Innanbygds som feller rev blir også prioritert i tildeling av rådyrjakt.

** Raudrev – høgfjellsområde/prioriterte soner inneber felling av raudrev i høgfjellsområde (over 700 moh). Dette for å ta ut raudrev i eller nærliggande rype- og skogsfuglbiotopar.

For denne ordninga blir det stilt krav om at:

  1. Jegeren som ynskjer å delta i ordninga må registrere seg hjå Skjåk Almenning i forkant. Dette inneber at ein må sende e-post til firmapost@skjak-almenning og skrive at ein ynskjer å delta på jakt etter raudrev i høgfjellsområde/prioriterte soner.

  2. Raudrevar som blir felt i høgfjellsområde/prioriterte soner må registrerast innan 24 timar etter felling. 

  3. For kvar rev som blir felt skal det vere med bildedokumentasjon frå fellingsstaden og skjermdump/bilde av posisjon.