Fritidsbustader
I Skjåk Almenning har vi rundt 600 private hytter. Dei største hyttegrendene ligg ved Grotli, Nysæter og Sota.  I tillegg er vi i gang med utbygging av 70 nye tomter i Billingen Hyttegrend. 

Billingen hyttegrend skal utbyggas med  full standard (vatn, kloakk, veg og straum), medan feltet ved Liavatnet / Sota er utbygd med veg, straum og vasspost.
Det er framleis att 10 ledige tomter ved Liavatnet / Sota, sjølve inngangsporten til Breheimen Nasjonalpark! 
Alle tomter for fritidseigedomar er festetomter.
Du er velkomen til å ta kontakt med oss for nærare informasjon!


Overnatting i fjellet
Skjåk Almenning har fleire buer i fjellet til utleige for alle. Buene er fine turmål i seg sjølv, eller som utgangspunkt for jakt, fiske og turar både på ski og til fots. Nokre passar også for overnatting vinterstid. 
Under villreinjakta er fleire av buene opne for jegerane.
Dei fleste buene er av nyare dato, men med enkel standard. Av utstyr er det vedfyring, omn med tørkerist, 3-bluss gasskokeapparat, dekkety og bestikk, kjelar og kjøkkenreiskapar, samt vaskeutstyr. Det som trengs å ta med er sovepose og mat. Dei fleste har 5 soveplassar. 
Ynskjer du å leige ei av hyttene våre, er desse tilgjenglege for booking på www.inatur.no. Her kan du også sjekke om hytta er ledig i det aktuelle tidsrommet.  

 

Overnatting nær veg
Vi har også fleire hytter til utleige som ligg ved veg. Legerhytta, Liabue, Heggjeåsage og Aursjobue er dei mest brukte. 

Både Legerhytta og Heggjeåsage har to soverom, og er aktuelle for barnefamiliar.  Liabue høver best for to personar, og er mest populær i forbindelse med rypejakt og fisketurar. Alle tre hyttene er lette å nå også på vinterstid.

Til Aursjobue er det ikkje vinterbrøyta veg, men på sommaren kan ein køyre heilt fram. Her kjem ein høgt til fjells, og hytta er flott utgangspunkt for fisketurar og ikkje minst i forbindelse med rypejakt. 

Du kan sjå nærare beskrivelse av kvar enkelt hytte her.